2018 Penang2Bangkok (檳城至曼谷) (Day 7 - 10)

Day 7 - Donsat to Tha Chana

騎行距離：86km          總距離：627km

今天一早就出發，踩了20K後條前胎已經救唔番，又距離前面大城市Surat Thani重有20K，無計可施，唯有推車。推咗幾佰米覺得唔對路，5個鐘都未到啦。

坐著順風車去Surat Thani

在Surat Thani其中壹間比較大的單車店

THB200連工包料

見有好多pick-up經過，作了人生第一次截順風車的決定。一舉起手指公，已經有架中型貨車停下來。我同司機講Surat Thani，再用手指住前胎。二話不說司機就將我部單車連行李抬上車。

司機重有個朋友喺車上，大家用手機番譯溝通。我將昨晚已經查到的單車店地址比他看，佢問我是否要搵單車舖。再傾落去原來佢地要去Chumphon，係我明天要去的目的地。當時真係有衝動直接去Chumphon住兩天，再慢慢搵單車店。

半個小時已經抵達單車店，內有好多RB及MTB，重驚無我要那種胎。個後生維修員好專業，試了幾次想打脹條胎。我用手機番譯同佢講不如搵條新胎比我。5分鐘內攪掂，連工包料200泰幣，即50港紙到。條胎牌子叫Duro，未聽過。

在Surat Thani轉入2007公路

喺Amazon Cafe飲杯凍咖啡已是例行公事

單車店就在我預定路線上，10時左右再出發由Surat Thani轉入2007及4112公路，一直到目的地Tha Chana，無乜車，有時10幾公里都是大直路，有幾個過山車式爬坡。唔太辛苦但好似浪費體力。

抵達Tha Chana前的轉入小路

抵達Tha Chana前的廟宇，有個好大佛像在山崖上

渡假屋，THB400壹晚

抵達Tha Chana前我轉入小路，4時許抵達渡假屋，400泰幣。

鎮上的大街

7-11好似小型超市咁大

鎮上應該有華人居住

雖然睇唔明，但Wi-Fi密碼都幾混亂

晚上去鎮上找飯吃，成個鎮就只有火車站前兩條大街，反而有壹間小型超市咁大嘅7-11，買了兩包預熱食品便返回渡假屋。

Day 8 - Tha Chana to Chumphon

騎行距離：121km        總距離：748km

今天不算辛苦雖然超過120km。開始時有點下雨，只是幾滴，大部分早上都是陰天。

離開渡假屋後就碰到下雨

沿途經過的種植園

棕櫚收集站

離開沿著4112公路30K轉4134公路去Lang Suan。4134公路有點意思，在山腰上穿過好多橡膠及棕梠種植園，有上有落，左轉右轉。

去到Lang Suan後再走幾公里小路便轉入AH2，泰國叫41號公路，即第三日由馬來西亞過境泰國的那條路。雖然好多高速大貨車，但大部分都有2米寛路肩，路邊有不少攤檔及便利店。中午在路邊檔以湯粉作午餐，泰國食湯粉會有壹盤蔬菜任依食，當然冰水任飲。

好多時所選的小路都是沿著火車軌而行

春薘火車站

舊火車頭

最後15公里我利用小路去進入Chumphon，好優閒無乜車。酒店在火車站附近，出便條街晚上好多嘢食。春薘是去泰國西南的Krabi及布吉的轉車站，從曼谷坐火車南下可以在此轉大巴去布吉，所以外國背包客特別多。

酒店外大街的食物檔

泰式炒麵

Salsa Hostel，有車友推薦

杧果糯米飯做甜品

講開條前胎，我都知無可能50蚊同幾佰蚊一樣咁嘅效果。去到80K左右，前胎慢慢漏氣，唯有每10K打一次氣，去到酒店先打算。剛才拆胎睇，發現內胎有漏氣，用手指摸外胎內層無什麼發現，在外表發現數粒玻璃碎。補好條內胎備用，以防萬一用條新胎先。

Day 9 - Chumphon to Bang Saphan

騎行距離：106km        總距離：854km

今天雖然只有106K、其實比昨天更辛苦。由春篷出來幾公里後便一直要爬上爬落，除了幾次近海邊是平路，大部分是過山車式爬坡。

春蓬河邊單車徑

轉入2021 Scenic Road

差不多36K接近春篷機場前，我轉入2021公路，又叫Scenic Road，或者Royal Coast Road，兩邊都有單車徑。

今天率之碰到長途單車友，喺壹對夫妻，兩人都係踩Brompton，其中女方重拖咗部Trailer裝行李。由於他們比較慢，講了幾句就離開。

沙灘上出租的小屋

沙灘上的Cafe

過山車式爬坡

今天頭轆到70K又開始漏氣，等去到酒店拆出來睇下是什麼原因。好彩是爬到坡頂發現，否則落斜中漏囇氣就大件事了，因為今天創造了今次行程中最高嘅43km/h，之後剎著落驚條前胎頂唔順。

4時抵達目的地Bang Saphan,。原本打算在Bang Saphan鎮上住宿，但聽說海邊有幾間不錯的餐廳，於是決定住在海邊的酒店。酒店住客不多，Wi-Fi用不了，單車鎖在大堂前面。

晚餐在酒店對面的餐廳，兩菜壹啤，望著大海，生活如此乎復何求。

Day 10 - Bang Saphan to Prachuap

騎行距離：103km        總距離：957km

今天以為比較軽鬆只有86km，最後行咗103km，究其原因有兩個原因。

太陽從東方升起

今天早上大部份都是這種小路

海邊渡假村，以外國客人為主

利用GPS導航主要以鄕郊小路為主，比行AH2足足短咗10公里。喺30公里時食炒飯作早餐，泰文我浄係識炒飯兩字，食完再行轉入預定小路時遇著道路重建，迫著去AH2繞道而行。

喺Huai Yang地方有好多北歐人居住，地產廣告有英文及瑞典文。之後被GPS帶到壹條砂石路，半踩半推之下幾公里出來是個海灘。稍事休息再跟GPS就大鑊了，路况愈來愈差，去到2K雜草叢生見唔到有去路，要走回頭路去AH2繞道。這兩次繞道我人個人估計多了10多公里路程。

北聚人居住的小區

地產廣告，有泰、英及瑞典文

沙石路，有部份是沙路要落車推

最後5-6K去Prachuap好得意，要穿過壹個空軍基地，出入口有軍人把守及查車。但內裡有個好大嘅海灘，都幾多遊客。離開軍管營前馬路會穿過機場跑道，幾神奇。由於有軍人駐守，唔敢拍照。

進入空軍基地

酒店在壹條橫街內，但走出來就有7-11及屈臣氏，相當方便。酒店只有13間房，單車放在房中，Wi-Fi訊號好強。

Prachuap大街，兩個街口內有三間7-11

海邊大街

海灘遠處是著名的猴子廟

晚上去海邊行，有幾間食肆，外國人都不少。選了間海鮮檔，兩菜壹啤，正。